Aron fær sérhannað merki

Aron Jóhansson nýtur liðsinnis íslenskrar auglýsingastofu við að koma sér og nafni sínu á framfæri.

Á Twitter-síðu Arons má sjá sérhannað merki sem auglýsingastofan Maurar útbjó en það er myndað út frá rúnunum fyrir A og J.

Aron er nú með stóran hóp „fylgjenda“ á Twitter-síðu sinni eða um 55 þúsund. Sú tala tók stórt stökk upp á við eftir að Aron ákvað að gefa kost á sér í bandaríska landsliðið og komst svo í lokahóp liðsins fyrir HM í Brasilíu.

Hönnun merkisins er eitt af fyrstu verkum Maura en í burðarliðnum eru fleiri verkefni tengd kappanum, svo sem ný heimasíða.

Bandaríkin mætir Gana í fyrsta leik sínum á HM þann 16. júní og verður leikurinn í beinni útsendingu á Stöð 2 Sport 2.