Aldrei fleiri í brekkunni á þjóðhátíð

Þjóðhátíð í Vestmannaeyjum náði hápunkti í gærkvöldi þegar um sextán þúsund manns tóku í þátt í hinum árlega Brekkusöng. Aldrei hafa fleiri lagt leið sína á Þjóðhátíð í Vestmannaeyjum.

Birgir Guðjónsson, formaður þjóðhátíðarnefndar, er mjög sáttur við hvernig hátíðin fór fram. Birgir þakkar góðu skipulagi árangurinn, hagstæðu veðri framan af og þeim einstöku náttúrulegu aðstæðum sem finna má í Herjólfsdal. Birgir segir margt sem fólk sækir í á þjóðhátíð.

„Þjóðhátíðin er heillandi, við erum með þrjá hápunkta, brennan á föstudeginum, flugeldasýningin á laugardeginum og brekkusöngurinn á sunnudeginum, umgjörðin er góð hjá okkur og við erum með góða gæslu í kringum þetta.“

Að sögn lögreglu var nóttin erilsöm en engin alvarleg mál komu upp. Tveir gistu fangageymslu, annars vegna ölvunar og hinn fékk gistingu að eigin ósk. Tíu fíkniefnamál komu upp í nótt og voru þau þá yfir fimmtíu talsins í Vestmanneyjum um helgina. Allt voru þetta neysluskammtar af kannabisi, kókaíni, amfetamíni og e-töflum.

Það er mat lögreglunnar í Vestmannaeyjum að Þjóðhátíðin hafi farið að mestu vel fram þetta árið, þá sérstaklega miðað við þann gífurlega fjölda sem var á hátíðinni.

„Þetta var svo mikill fjöldi að það skeður margt á svona stórri hátíð en heilt held ég að þetta hafi verið farið vel fram. Það voru engin meiriháttar vandamál. Við fengum mjög gott veður fyrir utan smá gusu í gærkvöldi og nótt“ segir Birgir.

Veður setti þó strik í reikninginn og margir misstu tjöldin sín í hvassviðrinu. Ákveðið var að opna sali íþróttahússins í Vestmanneyjum á ellefta tímanum í gær en þá var farið að hvessa í Vestmanneyjum. Nokkur hundruð manns leituðu skjóls í íþróttahúsinu. Samkvæmt upplýsingum frá lögreglunni í Vestmannaeyjum var þó engin úrkoma með þessum vindi fólk þá ekki í neinni vosbúð. Tjöld fuku þó í Herjólfsdal og á öðrum tjaldstæðum í bænum.

Þegar eru gestir farnir að streyma frá Eyjum. Vindur hefur ekki haft áhrif á samgöngur. Herjólfur fer tíu ferðir frá því klukkan tvö í nótt og framyfir miðnætti í dag. Farþegabáturinn Víkingur siglir nokkrar ferðir til Landeyjarhafnar. Þá er loftbrú með flugi frá Eyjum á Bakkaflugvöll og til Reykjavíkur.

Ljóst er að einhverjir munu ekki komast heim fyrr en á morgun. Lögreglan hvetur fólk til að fara ekki of snemma af stað eftir skemmtun helgarinnar og sýna þolinmæði í umferðinni.