„Umhverfismálin mikilvæg fyrir framtíð lands og þjóðar“

Þingflokkur Framsóknarflokksins samþykkti í dag tillögu Sigmundar Davíðs Gunnlaugssonar, formanns flokksins og forsætisráðherra, um breytingar á ríkisstjórn Íslands. Vísir greindi frá því fyrr í dag að á borðinu væri tillaga Sigmundar sem kynnt yrði á þingflokksfundi sem hófst klukkan 17.

Í tilkynningu frá Framsóknarflokknum segir að Sigmundur muni á ríkisráðsfundi á morgun, gamlársdag, leggja til við forseta Íslands að Sigrún Magnúsdóttir, alþingismaður og núverandi formaður þingflokks framsóknarmanna, taki við embætti umhverfis- og auðlindaráðherra. Sigurður Ingi Jóhannsson hefur gegnt því embætti samhliða starfi sínu sem sjávarútvegs- og landbúnaðarráðherra.

„Umhverfis- og auðlindamál eru mér hugleikin og ég hlakka til að takast á við þau verkefni sem bíða. Í mínum huga eru umhverfismálin mikilvæg fyrir framtíð lands og þjóðar, sér í lagi er varðar gróðurríki landsins og sjálfbæra nýtingu lífríkis hafs,“ segir Sigrún Magnúsdóttir.

Reynslumikill stjórnmálamaður

„Sigrún er reynslumikill, farsæll og heilsteyptur stjórnmálamaður sem nýtur trausts allra sem hún hefur unnið með á fjölbreyttum ferli. Sjónarmið og reynsla hennar vega þungt. Það verður mikill fengur í því að fá Sigrúnu Magnúsdóttur til liðs við ríkisstjórnina,“ segir Sigmundur Davíð.

Sigrún Magnúsdóttir er þingmaður Reykjavíkurkjördæmis norður. Hún á að baki feril í stjórnmálum auk þess að búa að víðtækri reynslu úr atvinnulífinu. Sigrún hefur gegnt fjölmörgum trúnaðarstörfum fyrir ríki og borg og sat í borgarstjórn Reykjavíkur í 16 ár, m.a. sem formaður borgarráðs í 6 ár og formaður borgarstjórnarhóps Reykjavíkurlistans frá 1994 til 2002.

Hún hefur setið í stjórnum margra fyrirtækja og stofnana borgarinnar og leitt mikilvæg verkefni, t.d. á sviði mennta- og fræðslumála. Sigrún var kjörin á þing vorið 2013 og hefur setið í stjórnskipunar- og eftirlitsnefnd Alþingis og verið formaður Þingvallanefndar auk þess að gegna embætti þingflokksformanns.