Gísli Pálsson fékk heiðursverðlaun Ásu Guðmundsdóttur

Stjórn Ásusjóðs veitti í dag, 30. desember, heiðursverðlaun fyrir árið 2014 en þetta kemur fram í tilkynningu frá verðlaunasjóði Ásu Guðmundsdóttur Wright.

Í ár eru verðlaunin veitt Gísla Pálssyni mannfræðingi. Verðlaunin voru veitt að viðstöddum forseta Íslands, stjórn Vísindafélags Íslendinga, Þjóðminjaverði og fulltrúum fræðasamfélagsins.

Stofnandi sjóðsins var frú Ása Guðmundsdóttir Wright. 46 ár eru liðin frá því að hún gaf Vísindafélagi Íslendinga peningagjöf á hálfrar aldar afmæli félagsins hinn 1. desember 1968.

Verðlaunasjóður Ásu Guðmundsdóttur Wright er skipaður þremur stjórnarmönnum.

Eru nú í stjórn sjóðsins þeir; Prófessor Sveinbjörn Björnsson fyrrverandi rektor HÍ; Prófessor Þráinn Eggertsson og Sigrún Ása Sturludóttir, M.Sc. sem er stjórnarformaður.

Verðlaunin eru heiðursskjal og silfurpeningur með lágmynd Ásu og merki Vísindafélags Íslendinga, nafn þiggjanda og ártal er grafið í jaðarinn og fylgir í ár þriggja milljón króna peningagjöf frá hollvinum.

Gísli Pálsson fjallaði um mannfræði sjávarútvegs í doktorsritgerð sinni. Hefur hann rætt um félagsleg áhrif fiskveiðistjórnunarkerfisins. Hann hefur átt þátt í að efla umræðuna um kvótakerfi í sjávarútvegi og hefur í framhaldi af því verið beðinn um að setjast í nefnd á vegum löggjafarþings og vísindaráðs Bandaríkjanna.

Auk þess að fjalla um rannsóknir á sjómönnum og sjávarútvegi hefur hann fjallað um íslenskar fornbókmenntir og skoðað dagbækur Vilhjáms Stefánssonar með augum mannfræðinnar.

Gísli hefur fjallað um mörk náttúru og samfélags og áhrifa hvors á annað og birt niðurstöður sínar á alþjóða vettvangi. Siðfræði læknisfræðinnar þegar safna skal og varðveita lífsýni, erfðaupplýsingar og líffæri hefur verið viðfangsefni hans. Hann hefur skrifað all nokkrar bækur.

Gísli Pálsson er fæddur 22. desember árið 1949 í Vestmannaeyjum. Hann lauk stúdentsprófi frá Menntaskólanum á Laugarvatni og BA námi í mannfræði frá Háskóla Íslands. Þaðan hélt hann til Englands til frekara náms.

Gísli lauk MA (masters) prófi í mannfærði árið 1974 og doktorsprófi árið 1982 frá University of Manchester. Hann varð lektor við Háskóla Íslands það sama ár og síðar varð hann dósent. Gísli var skipaður prófessor í mannfræði við Háskóla Íslands árið 1992.

Gísli er kvæntur Guðnýju Guðbjörnsdóttur prófessor og eiga þau tvö börn.