Lögreglan leitar að 84 ára gömlum manni

Lögreglan á höfuðborgarsvæðinu hefur lýst eftir Trausta Þórðarsyni. Hann er 84 ára gamall og búsettur í Hafnarfirði. Síðast er vitað um ferðir hans um klukkan ellefu í morgun en þá var hann í Ármúla í Reykjavík.

Trausti er á bifreið með númerinu UX-F34 en það er rauður Nissan Qashqai. Lögregla óskar eftir að ef fólk hefur orðið vart við ferðir Trausta eða séð til bifreiðar hans að haft sé samband við lögreglu í síma 444-1000.

Samkvæmt upplýsingum frá lögreglu hafa gögn frá fjarskiptafyrirtækjum leitt í ljós að síðast hafi farsími hans verið notaður í grennd við Rauðavatn. Björgunarsveitir hafa verið kallaðar út og eru þær að leita á því svæði.



Uppfært 18:23.

Í tilkynningu frá Slysavarnarfélaginu Landsbjörgu segir að síðast sé vitað að sími hans kom inn á sendi við Krókavað í Reykjavík um hádegi í dag og hafi leit því beinst inn á það svæði og til austurs núna, ásamt öðrum stöðum. 

Uppfært 20:30.

Að sögn upplýsingafulltrúa Landsbjargar hefur leitin enn ekki borið árangur. Um 170 björgunarsveitarmenn taka þátt í leitinni víðs vegar á höfuðborgarsvæðinu.

Uppfært 21:50.

Trausti er enn ekki fundinn. Ríflega tvö hundruð björgunarsveitarmenn taka nú þátt í leitinni og hafa björgunarsveitarmenn frá Suður- og Vesturlandi bæst í hópinn til að aðstoða við leitina.

Uppfært 23:00.

Í tilkynningu frá lögreglunni segir að maðurinn sé fundinn.