Beið í 90 mínútur með slösuðum ketti á umferðareyju

Karen Huld Tryggvadóttir beið eftir lögreglu í einn og hálfan tíma á umferðareyju á Nýbýlavegi, en hún kom að tveimur köttum sem keyrt hafði verið yfir. Á endanum gafst hún upp og fór sjálf með kettina á dýraspítala þrátt fyrir að dýralæknir hafi sagt henni að halda áfram að bíða eftir lögreglunni.

Vísir sagði fyrst frá málinu í gærkvöldi.

Karen, sem kom að tveimur um hálf sex í gærmorgun, sá strax að annar kötturinn var dauður en hinn var á lífi. „Ég lá allan tímann hjá kettinum, bara svona til að róa hana niður,“ útskýrir hún og segir að kötturinn hafi verið afar illa haldinn.

„Já, hún var skíthrædd, blóðug, mjög illa brotinn. Það sást alveg. Kjálkinn allur blóðugur og ábyggilega eitthvað að hryggnum.

Hún segir frá því að þrisvar sinnum hafi verið hringt í lögregluna auk þess sem tvisvar sinnum hafi verið hringt í dýralækni á bakvakt, án þess að nokkur hafi komið á vettvang. Á endanum gafst Karen upp og fór með kettina báða á dýraspítala.

Hún segir að áður hafi tvisvar sinnum verið hringt í dýralækni sem vildi eingöngu taka við köttunum úr höndum lögreglumanna.

Eftir rúmlega níutíu mínútna bið gafst Karen upp og ákvað að fara með kettina á dýraspítala. Þegar þangað var komið hringdi hún í dýralækninn. „Ég sagði henni að lögreglan væri ekkert að koma; ég get ekki skilið köttinn eftir og ég get ekki látið hana kveljast svona lengi og svona mikið.“

Karen hefur ekki fengið að heyra um afdrif kattarins. Hún á sjálf tvo ketti og er ósátt við að lögreglan hafi ekki komið fyrr á vettvang. Hún hefði viljað geta komið kettinum fyrr í læknishendur og vonast til þess að þetta mál verði tekið til skoðunar.

„Þetta er ekki í lagi.“