Haldið inni í skólum vegna gasmengunar

Börnum var haldið inni í skólum um tíma í höfuðborginni í dag vegna mikillar gasmengunar frá eldstöðinni í Holuhrauni. Umhverfisfræðingur segir tengsl milli mengunarinnar og heilsubrests og tölur sýna tuttugu prósenta aukningu í sölu astmalyfja á landinu öllu.

Borgarbúar hafa fundið töluvert fyrir menguninni í dag enda hafa loftgæðin verið slæm. Bæði hefur svifryk verið mikið og töluverð gasmengun frá eldgosinu í Holuhrauni. Þannig mældist styrkur brennisteinsdíoxíðs um 1800 mígrógrömm á rúmmetra þegar mest var í Reykjavík í dag.

Í skólum var börnum jafnvel haldið inni um tíma enda ráðlagði Heilbrigðiseftirlit Reykjavíkur að það yrði gert á meðan að mengunin var hvað mest. Þá voru víða felldar niður íþróttaæfingar vegna mengunarinnar. Fríða Rún Þórðardóttir, formaður Astma og ofnæmisfélags Íslands, er með astma og fann hún vel fyrir menguninni í dag. „Þetta er einn af verstu morgnunum sem ég hef upplifað,“

Þeir sem eru með slæman astma þurfa oft að taka meira af lyfjunum sínum á degi sem þessu. Í tölum sem fréttastofa fékk frá Lyfju sést að sala fyrirtækisins á astmalyfjum á landinu öllu hefur aukist um 20% frá því gosið hófst. Þórbergur Egilsson hjá Lyfju sagði í samtali við fréttastofu í dag að sala astmalyfja hefði tekið stökk í haust og ekkert annað gæti skýrt það en mengunin frá gosinu. Mismunandi er eftir landsvæðum hversu mikið salan hefur aukist en aukningin er hvað mest á Austurlandi. Hún hefur einnig aukist töluvert á höfuðborgarsvæðinu.

Ragnhildur Guðrún Finnbjörnsdóttir er umhverfisfræðingur og doktorsnemi í faraldsfræði. Frá árinu 2009 hefur hún skoðað áhrif loftmengunar á heilsu í Reyjavík. „Erlendar rannsóknir þær sýna einhverjar að það er samband á milli brennisteinsdíoxíðs og heilsubrests. Út frá þessu þá er eiginlega mín tilfinning sú að þetta er að hafa áhrif og sérstaklega á þá sem að eru viðkvæmir og þá vil ég nefna að viðkvæmir það eru ekki bara þeir sem eru með undirliggjandi sjúkdóma. Það eru líka börnin og okkar og það eru eldra fólk,“ segir Ragnhildur.