Formaður SÁÁ: Í fullkomnum heimi myndum við glöð byggja hátæknisjúkrahús fyrir börn

„Í fullkomnum heimi, þar sem grasrótarsamtökin SÁÁ þurfa ekki sjálf að fjármagna stóran hluta innlagna sjúklinga í áfengis- og vímuefnameðferð, myndum við glöð byggja nýtt hátæknisjúkrahús fyrir börn þar sem þau gætu komið í afvötnun. Hvernig við eigum að fara að því án þess að fá til þess fjármuni frá ríkinu veit ég ekki. Þangað til þá vil ég, sem formaður SÁÁ, ekki hafa það á samviskunni að vísa börnum eða nokkrum sjúklingi frá meðferð,“ segir Arnþór Jónsson, formaður SÁÁ í samtali við Vísi, en í dag birtu Kristín I. Pálsdóttir, ferðamálafræðingur, og GuðrúnEbbaÓlafsdóttir, kennari, aðsenda grein í Fréttablaðinu.

Þær Kristín og Guðrún Ebba eru einnig í forsvari fyrir Rótina, en í greininni lýsa þær yfir áhyggjum af því að börn séu send til meðferðar á Vogi þar sem samgangur er við fullorðna.

„Gagnrýni Rótarinnar á að sjálfsögðu rétt á sér eins og öll gagnrýni. Við hjá SÁÁ tökum því fagnandi að æ fleira fólk lætur sig málefni áfengis- og vímefnasjúklinga varða, enda er alkóhólismi risastórt samfélags- og heilbrigðisvandamál. Raunveruleiki málsins er hinsvegar sá að á Vogi fer fram 10 daga afvötnun, þar sem börn eru eftir allt saman, aðskilin frá fullorðnum. Á Vogi starfar hæfur hópur fagfólks sem gerir allt sem í sínu valdi stendur til þess að dvölin, sem getur oft reynst fólki þungbær þegar fólk er á þeim stað í lífinu að þurfa að leita sér hjálpar vegna vímuefndavanda, verði sem bærilegust. Því má heldur ekki gleyma í umræðunni að þessir tveir hópar eru skildir að á Vogi, börn og fullorðnir. Svo þegar lengra er haldið í meðferðinni er hún kynjaskipt, á Vík fara konur en á Staðarfell fara karlar. Við gerum okkar allra besta til að mæta þörfum sjúklinga okkar og höfum að sjálfsögðu pælt í því sem Rótin kemur fram með og reynt að bregðast við þeirri gagnrýni þegar hún á rétt á sér.“

Arnþór bætir við að Vogur hafi hjálpað fjölda fólks sem var illa statt.

“Stundum held ég að íslenskir alkóhólistar gleymi því hvað þeir hafa það gott,“ segir Arnþór, léttur í bragði.

„SÁÁ eru fyrst og fremst grasrótarsamtök sem hafa eytt síðastliðnum þremur áratugum í það að bæta aðbúnað alkóhólista og erum hvergi nærri hætt. Við munum halda okkar góða starfi áfram og vonum í einlægni að Rótin og sem allra flestir hlaupi undir bagga með okkur og hjálpi okkur til þess,“ heldur Arnþór áfram.

“Erindi eða fyrirspurn sem send hefur verið í nafni Rótarinnar til Umboðsmanns barna fer vonandi í viðeigandi ferlinúna. Það er því ekki við hæfi að ég eða aðrir hjá SÁÁ tjái mig efnislega um erindið á meðan Umboðsmaður barna hefur málið til meðferðar.“