Ekkert sem bendir til annars en að slys hafi orðið

Ekkert bendir til annars en að um slys hafi verið að ræða varðandi dauðsföll Ástu Stefánsdóttur og Pino Becerra Bolanos í Bleiksárgljúfri. Lögreglan á Selfossi hefur haft málið til rannsóknar og við rannsóknina hefur ekkert komið í ljós sem gefur annað til kynna en að um slys hafi verið að ræða.

Ásta Stefánsdóttir, lést vegna ofkælingar og drukknunar samkvæmt krufningu, en Pino lést vegna falls niður 30 metra háan foss.

Lögreglan á Selfossi segir rannsóknina vera komna á lokastig, enn sé þó viss gagnaöflun í gangi.

Ásta og Pino voru saman í sumarbústað í Fljótshlíðinni um hvítasunnuhelgina, en þegar ekkert hafði spurst til þeirra eftir helgina hófst umfangsmikil leit.