Gary Martin: Íslenska deildin er mun sterkari en fólk heldur

Gary Martin skoraði þrennu þegar KR vann 4-1 sigur á botnliði Þórs í lokaumferð Pepsi-deildar karla á laugardaginn og hann tryggði sér í leiðinni gullskó KSÍ. Gary er leikmaður 22. umferðar hjá Fréttablaðinu.

Gary skoraði 13 mörk í Pepsi-deildinni í ár, líkt og í fyrra þegar hann beið lægri hlut fyrir Atla Viðari Björnssyni í baráttunni um gullskóinn. „Það er alltaf gott að skora mörk þegar þú ert framherji og ég er mjög ánægður með hafa nælt í gullskóinn í ár eftir að hafa misst af honum í síðustu umferðinni í fyrra,“ sagði Gary sem sagðist hafa spilað mun betur í ár en í fyrra.

Þrátt fyrir að KR hafi ekki tekist að verja Íslandsmeistaratitilinn segist Gary vera nokkuð sáttur með uppskeru sumarsins, en KR vann Borgunarbikarinn eftir sigur á Keflavík í úrslitaleik.

„Við gerðum ágætlega í ár, þótt við værum ekki í baráttu um titilinn undir lokin. En við erum með ungt lið og misstum reynslumikla leikmenn eins og Bjarna (Guðjónsson), Brynjar (Björn Gunnarsson) og Hannes (Þór Halldórsson) eftir síðasta tímabil. Þetta var ágætt sumar og við unnum bikarinn, en við verðum að vera auðmjúkir og viðurkenna að FH og Stjarnan voru betri en við í ár,“ sagði Gary sem stefnir á að spila utan Íslands á næsta tímabili.

„Ég veit af áhuga erlendra liða og nú þarf ég bara að bíða eftir að deildirnar í Skandinavíu klárist. Ég vona að eitthvað gerist, en ef ekki verð ég áfram í KR. Þjálfararnir þar eru frábærir og standa mjög framarlega“ sagði markakóngurinn sem bætti við að honum fyndist Svíþjóð vera spennandi sem næsti áfangastaður á ferlinum. Gary segir að veran á Íslandi hafi gert honum gott.

„Íslenska deildin er mun sterkari en fólk heldur; það sést á árangri íslenskra liða í Evrópukeppninni og því hversu margir íslenskir leikmenn eru að standa sig vel í deildunum í Skandinavíu. Mér líður vel hér og Ísland hefur gert margt fyrir mig. Ég hef breyst úr strák í mann hér.