Einar Karl til hjálpar MS

Mjólkursamsalan hefur átt í vök að verjast eftir úrskurð samkeppniseftirlitsins, en MS var sektað um 370 milljónir fyrir að misnota markaðsráðandi stöðu sína. MS og Sölusamband afurðarstöðva mjólkuriðnaðarins, hvar Guðni Ágústsson fyrrverandi Landbúnaðarráðherra er framkvæmdastjóri, hafa kallað til sérfræðinga á sviði almannatengsla sér til hjálpar. Þar fer fyrir flokki Einar Karl Haraldsson, einhver helsti hákarl á sviði PR-mennsku á Íslandi um langt árabil en Einar Karl er meðal annars þekktur fyrir að vera helsti ráðgjafi Ólafs Ragnars Grímssonar forseta Íslands. Einar Karl hefur reyndar löngum verið kenndur við Samfylkinguna en lætur það ekki trufla sig að í mjólkuriðnaðinum teljast framsóknarmenn ráða lögum og lofum.

Ólgusjór í kjölfar úrskurðar

Guðni segir þetta rétt vera. „Mjólkuriðnaðurinn og MS hefur náttúrlega á sínum snærum samstarf við ótal sérfróða aðila; lögfræðinga, endurskoðendur og auglýsingafólk og almannatengslamenn. Því þetta er vandasamt verk að selja vörur og það vita allir sem í því standa. MS hefur staðið í miklum ólgusjó og að henni er sótt í framhaldi af þessari ákvörðun samkeppniseftirlitsins, sem ég vona nú að leiðréttist fyrir áfrýjunarnefndinni. Svo hefur þetta mál farið að snúast um allt aðra hluti, opinbera verðlagningu og þess vegna tolla sem eru alþjóðasamningar Íslands í VTO. Þannig að það ætla margir gróðapungar að hrinda þeirri löggjöf sem skilað hefur neytendum og bændum þremur milljörðum á ári. Og MS er náttúrlega bara landsnet kúabænda og bændurnir vilja engan svíkja, heldur halda í hönd neytenda og færa þeim inn á þeirra borð með gleðibrosi á vör á hverjum morgni þessa glæsilegu vöru,“ segir Guðni.

Ljóst má vera að ekki þarf Einar að hvetja Guðna til dáða, svo ákafur talsmaður er hann þess kerfis sem mjólkuriðnaðurinn vill nú verja.

Einar Karl liðsmaður í óvægnu stríði

Guðni segir jafnframt að Einar Karl hafi unnið með MS og mjólkuriðnaðinn að ýmsum verkefnum um langa hríð. „Hann kom hér fyrst við sögu fyrir um tíu árum þegar menn voru að skipuleggja allt kerfið. Ég kallaði hann á vettvang til að vinna að úttekt um opinbera verðlagningu, hann vann þá skýrslu um hverju hún hefur skilað neytendum. Svo vann hann hér merkilega úttekt að okkar frumkvæði um vernd vöruheita fyrir samtök iðnaðarins.“

Og, oft var þörf, en nú er nauðsyn. „Vissulega er Einar Karl sérfræðingur sem núna hefur komið á vaktina til að færa þetta í form með okkur, þennan árangur og hjálpa til við að upplýsa neytendur um árangur þessarar stefnumörkunar. Og hjálpa okkur að mæta árásunum. Það er ólgusjór og óvægið stríð sem ég vona að flestir sjái nú í gegnum, en bráðum verða sundin blá og friður á ný og sannleikurinn liggur skýr á borðinu og mjólkuriðnaðurinn mun áfram færa neytendum sína glæsilegu vöru; smjörið og rjómann og ostana góðu og skyrið sem gerir menn háa og granna og sterka ... um allan heim,“ segir Guðni Ágústsson.