"Við getum ekki bara látið fólk deyja og látið eins og ekkert sé“

Eins og Stöð 2 og Vísir hafa áður fjallað um lést Pétur Pétursson þann sjöunda janúar síðastliðinn, rúmri viku eftir að honum var gefinn rangur lyfjaskammtur á hjúkrunarheimilinu Garðvangi. Um mjög sterk morfínlyf var að ræða og fékk Pétur um tuttugu sinnum meira af lyfinu en hann átti að þola.

Landlæknisembættið rannsakaði atburðinn og hefur fréttastofa niðurstöðuskýrsluna undir höndum. Þar segir að afar ólíklegt verði að telja að orsakasamhengi hafi verið á milli hinnar röngu lyfjagjafar og andláts Péturs. Engar skýringar eru þó gefnar á þessari niðurstöðu og heldur ekki á þeirri staðreynd að Pétri var aldrei gefið mótefni sem þó var til staðar.

„Það kemur ekkert fram í skýrslunni hvað gerðist. Þetta er allt mjög loðið og þar eru engin svör. Það er eins og hann hafi bara dáið eins og það sé engin ástæða fyrir því,“ segir Maríus Sævar Pétursson, sonur Péturs heitins.

Gjöf mótefnis fyrirskipuð

Fréttastofa ræddi við lækni Péturs á Garðvangi. Hann undrast niðurstöðurnar og telur andlátið vissulega tengjast lyfjagjöfinni. Hann staðfestir að hafa fyrirskipað gjöf mótefnisins strax eftir atvikið og hefur engar skýringar fengið á því af hverju þau tilmæli voru hunsuð.

Fleiri læknar sem fréttastofa hefur rætt við segja að gefa hefði átt mótefnið og prófessor í lyfja- og eiturefnafræði hefur sagt óvenjulegt að gefa það ekki. Mótefnið var til staðar í sjúkrabílnum sem sótti Pétur og flutti hann á Heilbrigðisstofnun Suðurnesja, en var ekki notað.

„Það er bara óskiljanlegt,“ segir Maríus Sævar. „Allir sem þekkja til eru sammála um það.“

Fjölskylda Péturs leggur ekki trúnað á að engin tengsl hafi verið milli lyfjagjafarinnar og andlátsins enda hafi hún fylgst með heilsu hans hraka hratt eftir að lyfin fóru að virka.

„Við vitum betur. Það er búið að lýsa þessu öllu fyrir okkur, bæði læknirinn á Garðvangi og fleiri sem voru þarna. Þetta átti ekkert að gerast. Hann var frískur og lyfjagjöfin var klárlega ástæðan. Hann fékk ekki rétta meðhöndlun,“ segir Maríus Sævar.

Í fyrstu málsgrein tíundu greinar laga um landlækni og lýðheilsu segir að þeim sem veiti heilbrigðisþjónustu beri að tilkynna landlækni án tafar um óvænt atvik sem valdið geti sjúklingi alvarlegu tjóni. Atvikið var þó ekki tilkynnt landlækni fyrr en Pétur lést, eða rúmri viku eftir eftir að það átti sér stað. Þá var það ekki tilkynnt lögreglu, eins og lög um dánarvottorð segja fyrir um.

Fjölskyldan óskar eftir skýringum

„Við hringdum í landlækni og hann lofaði okkur svörum en síðan hefur hann ekkert haft samband við okkur,“ segir Maríus Sævar.

Ættingjar Péturs velta fyrir sér hvort verið sé að fela óþægilegt mál. Þeir vilja að mistökin verði viðurkennd, í von um að þau endurtaki sig ekki.

„Við getum ekki bara látið fólk deyja og látið eins og ekkert sé. Fólk getur gert mistök og það er allt í lagi, en við verðum líka að læra af þeim,“ segir hann.

Hvorki náðist í landlækni né yfirlækni Eitrunarmiðstöðvar vegna málsins í dag.