Miklar framkvæmdir í fjármálaráðuneytinu vegna myglusvepps

Myglusveppur fannst í Arnarhvoli, húsnæði fjármálaráðuneytisins, síðasta vor. Þarf því nú að fara í miklar framkvæmdir á innanhúss en endurbótum utanhúss er nýlokið.

Myglan fannst á efstu hæð hússins og reyndist afmörkuð við svæði sem hafði skemmst mikið vegna leka. Síðar kom svo upp mygla á tveimur öðrum stöðum í ráðuneytinu.

Öllum þessum svæðum var lokað og starfsfólk flutti sig um set innan Arnarhvols. Elva Björk Sverrisdóttir, upplýsingafulltrúi ráðuneytisins, segir myglusveppinn hafa valdið starfsfólki ama. Ekki sé hægt að útiloka að sveppurinn hafi haft einhver tímabundin áhrif á heilsu nokkurra einstaklinga.

Myglusveppur hefur ítrekað komið upp í húsnæði í miðbæ Reykjavíkur seinasta árið. Mygla kom upp í velferðarráðuneytinu og á skrifstofum Alþingis, en einnig í nokkrum húsum Landsbankans í Hafnarstræti og Austurstræti sem og í gamla Landsímahúsinu.