Eldur í hvalasýningunni: „Þetta var áfall“

Stella Stefánsdóttir, framkvæmdastjóri sýningarinnar Whales of Iceland, sem opna átti á fimmtudaginn næstkomandi segist lítið vita um það tjón sem hlotist hefur eftir að eldur kviknaði í sýningarrýminu í gær. „Lögregla er enn á vettvangi en við höfum ekki fengið að fara inn ennþá. Ég veit að það er mikið sót og vatnstjón er eitthvað.“ Úðakerfið var sett af stað í gær en langan tíma tók að reykræsta rýmið enda gríðarlega stórt. 

Slökkviliðið á höfuðborgarsvæðinu var kallað út um fjögurleytið í gær en eld tók í síðasta hvalalíkaninu sem setja átti upp áður en sýning opnaði. Mikinn svartan reyk lagði frá húsinu og af eldinum hlaust vond lykt. Nokkuð greiðlega tókst að slökkva eldinn.

Iðnaðarmenn voru við störf í sýningarrýminu þegar þeir urðu eldsins varir. Stella var ekki sjálf á staðnum en fékk tilkynningu um eldsvoðann frá einum mannanna. „Þetta var áfall,“ viðurkennir hún. „Það voru iðnaðarmenn á staðnum og þeim brá vissulega mjög mikið. Það tekur tíma fyrir alla að vinna úr svona.“ 

Ekki liggja fyrir upplýsingar um kostnaðinn sem liggur að baki hverjum hval en þeir eru sumir hverjir á stærð við strætisvagn. Sýningin verður sú stærsta sinnar tegundar í Evrópu en safnið spannar 1700 fermetra. Stella segist síður en svo hafa lagt árar í bát. „Við erum staðráðin í að halda áfram. Þessi sýning verður opnuð en við eigum enn eftir að vinna í því á grundvelli upplýsinga um tjón hvenær það verður. Við teljum eftir sem áður að þetta eigi enn erindi við ferðamenn á Íslandi.“

Nánari upplýsingar munu liggja fyrir þegar lögregla lýkur rannsókn sinni síðdegis. Eins og greint var frá á Vísi í gær er talið mögulegt að kviknað hafi út frá rafsuðu en það hefur ekki fengist staðfest. Líkönin eru úr plastefni sem fuðraði upp. Tveir iðnaðarmenn voru fluttir á sjúkrahús vegna minniháttar áverka. Lögregla tók skýrslu af iðnaðarmönnunum í gær.