Rússar hyggjast senda fleiri hjálpargögn

Utanríkisráðherra Rússlands segir Rússa ætla senda aðra bílalest með hjálpargögnum til austurhluta Úkraínu „innan fárra daga“. Sergei Lavrov sagði ástandið á svæðinu fara versnandi.

Úkraínsk stjórnvöld heimilaði ekki komu fyrri bílalestarinnar sem sneri aftur til Rússlands um helgina. Í frétt BBC segir að Úkraínustjórn hafi óttast að innan um hjálpargögnin hafi leynst vopn sem hafi verið ætlað að koma í hendur aðskilnaðarsinna í Úkraínu sem eru á bandi Rússlandsstjórnar. Gögnunum var ekið frá Moskvu fyrr í mánuðinum í tæplega þrjú hundruð vörubílum.

Rúmlega tvö þúsund hafa látið lífið í átökum úkraínska stjórnarhersins og sveitum aðskilnaðarsinna síðustu mánuði. Þá hafa um 330 þúsund neyðst til að flýja heimili sín.

Vladimir Pútín Rússlandsforseti og Petro Poroshenko Úkraínuforseti munu koma saman til fundar í Minsk, höfuðborg Hvíta-Rússlands, á morgun þar sem til stendur að ræða ástandið í austurhluta Úkraínu.

Lavrov hefur komið þeim skilaboðum til úkraínska utanríkisráðuneytisins að til standi að senda nýja bílalest á næstu dögum. Segist hann vonast til að samkomulag náist um nánari útfærsluatriði.