Samfélagið í olnboganum

Söngleikurinn Revolution in the Elbow of Ragnar Agnarsson Furniture Painter, eða Uppreisnin í olnboga Ragnar Agnarssonar húsgagnamálara, var frumsýndur á Broadway í New York í vikunni, en þar segir frá óvæntum atburðum í litlu samfélagi sem þrífst inni í olnboganum á áðurnefndum húsgagnamálara.

„Þetta er mjög dramatísk og stór saga og þessi súrrealíska umgjörð hefur hefur í raun lítið með söguþráðinn að gera heldur er leið sem ég fer til að segja söguna á frumlegan hátt," segir Ívar Páll Jónsson, höfundur verksins.

Tugir manna koma að uppsetningu verksins, sem leikstýrt er af Bergi Þór Ingólfssyni. Tónlistin í verkinu hefur hlotið mikið lof.

„Þetta er mjög óhefðbundin söngleikjatónlist. Þetta er svona venjuleg indie-tónlist. Ég fékk hann Stefán Örn Gunnlaugsson með mér til að taka þetta upp og útsetja og það tókst svona frábærlega til. Tónlistin er í fyrsta sæti í verkinu og er ekki bara miðill til að koma texta áleiðis, eins og oft vill vera, heldur er til að skapa stemmningu," segir Ívar Páll.

Söngleikurinn hefur fengið misjafna dóma.

„Verkið hefur bæði fengið lofsamlega dóma og svo aðra líka. Það eru einhverjir sem skilja ekki hvað verið er að gera og skilja til dæmis ekki hvers vegna þetta gerist inni í olnbga. Gagnrýnendur á þessu sviði eru gjarnan vanari þessum hefðbundnu söngleikjum og er illa við að það fasta form sé brotið upp," segir Ívar Páll.

En fáum við landsmenn einhverntíman að berja íbúana í olnboganum á Ragnari augum?

„Ég vona það. Ég vona að það séu einhver olnbogabörn á Íslandi sem geti tekið þetta að sér."