Kjötið reyndist vera kjöt í þetta sinn

Matvælastofnun framkvæmir ekki reglubundnar athuganir á öllum vörum sem unnar eru úr kjöti til að sannreyna hvort merkingar séu réttar, heldur framkvæmir einstaka úttektir og skoðar verklag við framleiðsluferlið sjálft.

Ekkert hrossakjöt hefur fundist í íslenskum kjötafurðum samkvæmt nýrri mælingu stofnunarinnar. Þá reyndist kjötið í þessum afurðum vera alvöru kjöt.

Snemma árs 2013 lét Matvælastofnun rannsaka kjötinnihald 16 íslenskra matvara á markaði til að kanna hvort þær innihéldu hrossakjöt án þess að þess væri getið á umbúðum. Niðurstöður sýndu að ekki hafði neinu hrossakjöti verið blandað í vörurnar.

Hins vegar kom í ljós að engin þessara vara uppfyllti kröfur um merkingar og reyndust tvær vörur ekki innihalda nautakjöt þrátt fyrir merkingar þar um.

Niðurstöður rannsóknarinnar sýndu að Nautabaka frá Gæðakokkum í Borgarnesi sem sögð var innihalda 30 prósent nautahakk í fyllingu, sem átti að vera helmingur af þyngd vörunnar, innihélt ekkert kjöt. Fyrirtækið Gæðakokkar hefur nú skipt um nafn og heitir Kræsingar ehf.  

Hverju geta neytendur treyst? 

Matvælastofnun hefur reglubundið eftirlit með matvælafyrirtækjum sem selja afurðir sem innihalda dýraprótein, þ.e. kjöt. En hversu reglulegt er þetta eftirlit? Geta neytendur treyst því að í til dæmis hamborgarakjötinu þsem þeir kaupa sé ekkert annað en nautakjöt? Lærdómur neytenda úr stóra kjötbökumálinu í fyrra er sá að það er full ástæða til að tortryggja merkingar matvæla hér á landi.

Matvælastofnun fylgist með því hvort framleiðendur séu með verklag sem tryggi rétt innihald. „Við gerum þetta meðal annars með því að skoða hvort að merkingar séu í samræmi við uppskriftir. Í eftirliti þá tökum við gjarnan eina eða fleiri vörur og berum þetta saman,“ segir Sigurður Örn Hansson forstöðumaður matvælaöryggis- og neytendamála hjá Matvælastofnun (MAST). 

En þið gerið ekki reglubundnar athuganir á hverri og einni vöru? „Vörutegundir hjá matvælafyrirtækjum eru svo margar að það er ógerlegt að framkvæma 100% skoðun á því.“

Héldu fræðslufundi 

Eftirfylgni Matvælastofnunar við stóra kjötbökumálið var að halda fræðslufundi með framleiðendum. Síðan var ráðist í sérstaka sýnatöku í júní síðastliðnum, þ.e kannað var í annað sinn hvort kjötið sem væri á boðstólnum í búðum væri ekki örugglega kjöt. 

„Og niðurstaðan úr því verkefni var að merkingarnar stóðust í öllum tilvikum, varðandi kjötinnihaldið,“ segir Sigurður Örn. Þá fannst blessunarlega ekkert hrossakjöt í þessari athugun heldur.