Balotelli vill koss frá drottningunni | Færist nær Arsenal

Mario Balotelli er enn orðaður við Arsenal í ensku úrvalsdeildinni en umboðsmaður hans er sagður hafa flogið frá Brasilíu til Ítalíu vegna málsins.

Balotelli mun vera til sölu hjá AC Milan vegna fjárhagsvandræða félagsins en það vill fá 37 milljónir evra fyrir kappann - allt í peningum og fyrirfram.

Ítalskir fjölmiðlar segja að Arsene Wenger, stjóri Arsenal, hafi haft samband við AC Milan vegna málsins og að boltinn sé nú hjá Lundúnarfélaginu. Umboðsmaður Balotelli, Mino Raiola, mun hafa flogið aftur heim til Ítalíu til að ræða við forráðamenn AC Milan um söluna.

Sjálfur hefur Balotelli verið duglegur að slá á léttu strengina á samfélagsmiðlum en hann tryggði Ítölum 2-1 sigur á Englandi í fyrstu umferð riðlakeppninnar. Ítalía mætir Kosta Ríku í kvöld.

Hér fyrir neðan má sjá beiðni hans á Twitter þar sem hann óskar eftir kossi frá sjálfri Englandsdrottningu ef Ítölum tekst að vinna leikinn í kvöld.