Hefja leit í Bleiksárgljúfri á ný

Lögreglan á Hvolsvelli undirbýr nú að hefja aftur leit í Bleiksárgljúfri að Ástu Stefánsdóttur, 35 ára lögfræðingi, sem ekkert hefur spurst til síðan um Hvítasunnuhelgina. Rannsókn málsins er enn í gangi en lögregla leitar nú fyrst og fremst að vísbendingum. Margir hafa haft samband við lögreglu en engin vísbending hefur verið þess eðlis að hægt sé að byggja á henni.

Lögregla athugar nú hvort hægt sé að lýsa betur upp Bleiksárgljúfrið til þess að bæta leitarskilyrði. Einnig íhugar lögregla að hafa áhrif á vatnsflæði í gljúfrinu og verður það gert með dælingu eða minni stíflum. Lögregla hefur áður haft áhrif á flæðið við leitina þegar sett var stífla í hluta fossins. Kærasta Ástu, Pino Becerra Bolanos, fannst í Bleiksárgljúfri mánudagskvöldið 10. júní. 

„Við teljum okkur samt sem áður hafa leitað ansi vel. En þetta gljúfur er mjög flókið og ekkert lamb að leika sér við,“ segir fulltrúi lögreglu í samtali við Vísi. Það er fyrst og fremst lögregla sem leitar núna en þegar mest lét tóku um 300 manns þátt í leitinni. Björgunarsveitir á svæðinu hafa verið að aðstoða lögreglu og haft eftirlit með vötnum.

Leitin í Bleiksárgljúfri krefst undirbúnings og er vinna hafin við þann undirbúning. Mögulegt er að leitin verði hafin að nýju strax núna um helgina.