„Mamma, hvað er að?"

Þriggja barna móðir varð tuttugu milljónum krónum ríkari um helgina þegar dregið var í lottóinu. Hún áttaði sig þó ekki á því fyrr en á mánudeginum að hún hefði dottið í lukkupottinn.

Konan skrifaði tölurnar samviskusamlega niður eftir útdráttinn og spáði ekki meira í þeim að því er fram kemur í tilkynningu frá Íslenskri getspá. Hún hafði keypt miðann í rælni og var engin regla á kaupum fjölskyldunnar á getraunamiðum. Hafði fjölskyldan verið undir miklu álagi undanfarið.

Á mánudeginum rakst hún á miðann, bar saman tölurnar og gekk í rólegheitum inn í Hagkaup þar sem miðinn var keyptur. Dóttir hennar skaust inn í búð eftir vörum og þegar þær mæðgur hittust inni í versluninni spurði dóttirin: „Mamma, er eitthvað að?“ og fékk svarið: „Ég var að vinna tuttugu milljónir í Lottóinu…!“

Aðspurð segist konan ætla að leggja peningana inn í banka og reyna að ávaxta þá en börnin hennar þrjú hvetja hana til að gera eitthvað fyrir sjálfa sig. „Kauptu þér eitthvað sem þig langar í!“ segja þau einum rómi.

Hún segist eiga eldgamalt sófasett sem er búið að bæta svo nýr og stór sófi væri kannski eitthvað sem hún gæti hugsað sér – nógu stór til að rúma alla fjölskylduna með mökum og barnabörnum. Svo ætli hún að styðja við börnin.

Þá hafi konan hug á því að fara í stutta ferð til útlanda er líði á haustið. Henni líði svo miklu betur í tímanum.