"Get ekki lengur orða bundist"

Slökkviliðið á höfuðborgarsvæðinu var kallað til rétt fyrir miðnætti í gær vegna elds í Iðufelli 10 í Reykjavík. Slökkvistarf gekk að sögn vel en þrír voru fluttir á slysadeild, meðal annarra íbúi íbúðarinnar þar sem eldurinn kom upp.

Eins og sjá má á meðfylgjandi myndbandi er íbúðin afar illa farin auk þess sem sameignin í húsinu er öll í sóti.

Íbúi á fjórðu hæð hússins, sem ekki vildi koma fram undir nafni, var enn á fótum þegar hann varð eldsins var.

„Ég fann brunalykt og opnaði fram á gang og þá fylltist íbúðin af reyk,“ sagði íbúinn, sem hringdi í slökkviliðið og fékk þær upplýsingar um að þeir væru á leiðinni.

Lögreglan á höfuðborgarsvæðinu fer með rannsókn málsins og rannsakar meðal annars hvort um íkveikju hafi verið að ræða. En málið er flókanara en svo.

Halldór Gunnarsson í Holti er eigandi íbúðarinnar en dóttir hans hefur verið búsett þar undanfarið. Dóttir Halldórs hefur þjáðst af geðsjúkdómi um árabil.

„Það er þannig að kerfið virðist ekki geta komið þeim til bjargar sem bæði glíma við geðsjúkdóma og áfengisfíkn,“ segir Halldór.

Og hann segir þau foreldra hennar hafa um árabil reynt að finna úrræði fyrir dóttur sína.

„Hún vildi ekki legggjast sjálfviljug inn á Klepp. Þá var í raun eina úrræðið fyrir okkur að láta svipta hana sjálfræði. Að láta lögregluna brjótast inn í íbúðina og henda henni út á götu.“

Halldór segist telja brunann í gærkvöldi hafa verið slys.

„En ég treysti mér þó ekki til að fullyrða um það. Ég veit bara að nú er mælirinn fullur. Ég get ekki lengur orða bundist um þessi mál,“ sagði Halldór.

Viðtalið við Halldór má sjá í heild sinni á meðfylgjandi myndskeiði.