Innlent

Leitað að Reykvíkingi ársins

Sunna Karen Sigurþórsdóttir skrifar
Ólafur Ólafsson var valinn Reykvíkingur ársins 2013, Gunnlaugur Sigurðsson Reykvíkingur ársins 2011, Jón Gnarr borgarstjóri og Theodóra Guðrún Rafnsdóttir, Reykvíkingur ársins 2012
Ólafur Ólafsson var valinn Reykvíkingur ársins 2013, Gunnlaugur Sigurðsson Reykvíkingur ársins 2011, Jón Gnarr borgarstjóri og Theodóra Guðrún Rafnsdóttir, Reykvíkingur ársins 2012

Borgarstjórinn í Reykjavík óskar nú í fjórða sinn eftir ábendingum frá borgarbúum um Reykvíking sem verið hefur öðrum til fyrirmyndar. Ábendingarnar verða notaðar til að velja Reykvíking ársins.

„Í Reykjavík eru fjölmargir fyrirmyndarborgarar sem hugsa fyrst og fremst  um hag borgarinnar og borgarbúa, vinna óeigingjarnt starf í þágu samborgara sinna, láta gott af sér leiða með framkomu sinni eða halda borginni snyrtilegri og fallegri. Ég hvet Reykvíkinga til að benda á þá samborgara sína sem væru vel að þessum heiðri komnir. Valið hefur tekist afar vel í þrjú síðustu árin. Þeir sem hafa hlotið þennan titil eru sannkallað fyrirmyndarfólk, “ segir Jón Gnarr borgarstjóri.

Reykvíkingur ársins hlýtur vegleg verðlaun frá Reykjavíkurborg,  meðal annars boð frá borgarstjóra um að opna Elliðaárnar með honum. Auk þess fær hann árskort í sundlaugar ÍTR, árskort í Fjölskyldu og húsdýragarðinn, Menningarkortið til eins árs og leikhúsmiða í Borgarleikhúsið.

Ábendingum um fyrirmyndareinstaklinga má skila inn, ásamt rökstuðningi, á netfangið hugmynd@reykjavik.is eða í bréfpósti á skrifstofu borgarstjóra fyrir 19.maí 2014. Póstinn ber að merkja „Reykvíkingur ársins.“ Þriggja manna dómnefnd velur síðan úr innsendum tillögum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.