Innlent

Skemmtiferðaskip til Íslands í sérstakar Norðurljósasiglingar

Stefán Árni Pálsson skrifar
Björn Einarsson, framkvæmdastjóri TVG-Zimsen.
Björn Einarsson, framkvæmdastjóri TVG-Zimsen. visir/gva

Búist er við rúmlega hundrað þúsund ferðamönnum til landsins með skemmtiferðaskipum í sumar sem er svipaður fjöldi og á síðasta ári.

,,Það er ljóst að vinsældir Íslands eru alltaf að aukast en flóra skemmtiferðaskipa sem boðað hafa komu sína til landsins er að aukast. Við munum sjá skemmtilega nýbreytni í mars á næsta ári en þá munu koma hingað tvö skemmtiferðaskip í sérstakar Norðurljósasiglingar sem hefur ekki áður gerst,“ segir Björn Einarsson, framkvæmdastjóri TVG-Zimsen, en fyrirtækið þjónustar flest skemmtiferðaskipin sem koma til landsins.

„Þetta eru skipin Marco Polo og Discovery og er ætlunin að þau verði á hér við land þegar næsti sólmyrkvi verður á Íslandi 20. mars 2015. Þá mun skemmtiferðaskipið Disney Magic koma til Reykjavíkur í júlí á næsta ári og stoppa yfir nótt við Skarfabakka. Þetta er í fyrsta skipti sem Disney skip kemur til Íslands.“

Björn segir að það sé augljóst að vægi Íslands sem viðkomustaðar fyrir skemmtiferðaskip sé sífellt að aukast.

„Við finnum það hjá erlendum skipaútgerðum að áhugi ferðamanna á siglingum hingað eykst ár frá ári og þar horfa menn á að Ísland sé í lykilhlutverki á Norðurslóðum. Verið er að brydda upp á nýjungum í siglingum eins og þessi aukna flóra skemmtiferðaskipa hingað til lands sýnir. Norðurljósin hafa gríðarlegt aðdráttarafl eins og Norðurljósasiglingarnar eru gott dæmi um og sigling Disney Magic er undir áhrifum frá Disney myndinni Frost. Þetta býður augljóslega upp á ný og mikilvæg tækifæri fyrir okkur Íslendinga. Það eru klárlega mjög spennandi tímar framundan í þessum geira,“ segir Björn.

Japanska skemmtiferðaskipið Asuka II er fyrsta skemmtiferðaskipið sem kemur til landsins á vegum TVG-Zimsen. Í sumar en skipið mun vera í Reykjavík dagana 20.-21. maí en á skipinu eru 960 farþegar.

,,Skemmtiferðaskipin eru mjög mikilvægur þáttur í ört stækkandi ferðaþjónustugeiranum sem var stærsta útflutningsafurð Íslendinga á árinu 2013. Heildarútflutningstekjur ferðaþjónustunnar námu um 275 milljörðum á síðasta ári og var greinin í fyrsta skipti efst yfir gjaldeyrisskapandi greinar hér á landi,“ segir Björn ennfremur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.