Hópur sem kallar sig Ruslaurant ætlar næstkomandi fimmtudag að bjóða gestum og gangandi upp á mat sem veiddur hefur verið upp úr ruslagámum matvöruverslana og veitingastaða á höfuðborgarsvæðinu. Sjö skipa hópinn og eru þau öll nemendur í grafískri hönnun í Listaháskóla Íslands. Markmið þeirra er að vekja athygli á öllum þeim mat sem fer til spillis daglega.

„Árlega er einum þriðja af öllum mat hent. Á meðan svelta milljónir manna,“ segir Jónbjörn Finnbogason, einn af meðlimum hópsins og segir hann það staðreynd að þessum sóuðu matvælum mætti vafalaust verja betur.

Hópurinn byrjaði í síðustu viku að leita matar og segir Jónbjörn það hafa komið á óvart hversu mikið af góðum mat hafi fundist. „Oft var þetta bara útlitsgalli á umbúðunum og pakkningarnar voru í einhverjum tilfellum einungis klístraðar,“ segir hann og bætir við að margt af því sem fannst renni ekki út fyrr en eftir eitt til tvö ár. 

Reiða fram mat úr gámi

Hópurinn vakti athygli á viðburðinum á Facebook í gærkvöld og hafa viðbrögðin ekki látið á sér standa, því tæplega hundrað og fimmtíu manns hafa boðað komu sína. „Við bjuggumst svo sannarlega ekki við svona góðum viðbrögðum og ótrúlegasta fólk hefur haft samband við okkur.“

Viðburðurinn fer fram eins og fyrr segir næstkomandi fimmtudag og er hann haldinn að Járnbraut 1 á Granda. Hópurinn hefur komið sér upp eldunaraðstöðu og verður eldað ofan í almenning þeim að kostnaðarlausu.

„Við ætlum að reyna að skapa skemmtilega stemmningu og munum við reiða fram matinn úr gámi,“ segir Jónbjörn og segir að allt það sem í boði verður sé gert úr gæðahráefni og segir fólk ekki þurfa að óttast að maturinn kynni að vera skemmdur. 

„Það er aldrei að vita nema við gerum þetta aftur,“ segir Jónbjörn að lokum.