Sextán prósent íslenskra barna búa við fátækt. Þetta kemur fram í nýrri skýrslu Barnaheilla - Save The Children, í Evrópu þar sem fátækt barna í álfunni er kortlögð. Framkvæmdastjóri Barnaheilla segir vandamálið falið hér á landi. 

Fátækum börnum hefur fjölgað hratt í Evrópu síðustu ár. Skýrslan sem kynnt var í dag er samstarfsverkefni 12 Evrópuþjóða en tekur til landanna 28 í Evrópusambandinu auk Íslands, Noregs og Sviss. Í skýrslunni kemur fram að fátækt íslenskra barna hafi aukist jafnt og þétt frá hruni en á bilinu níu og tíu þúsund börn búa á heimilum sem eru undir lágtekjumörum hér á landil og fjölgaði þeim um 2,8 prósent á árunum 2008-2012. Á sama tíma dró úr fátækt í öðrum Evrópulöndum, til að mynda í Noregi og Finnlandi.

Barnaheill tóku nýverið viðtöl við börn sem hafa búið við fátækt og skort á efnislegum gæðum. Þar kom í ljós að börn sem alast upp við fátækt eiga frekar á hættu að verða fyrir ofbeldi og vanrækslu vegna félagslegs vanda en önnur börn. Þá upplifa börn, sem búa við óöryggi og ótta sem fylgir fjárhagsáhyggjum foreldra sig minnimáttar.