Maðurinn sem rændi verslunina Dalsnesti í Hafnarfirði í gær er enn ófundinn og lögreglu hafa ekki borist neinar vísbendingar um hann. Töluvert reiðufé var í kassanum þar sem verslunin tekur ekki við greiðslukortum.



Sigurður Lárusson, eigandi verslunarinnar, var ekki á staðnum þegar ránið átti sér stað en sá í öryggismyndavélum að ræninginn, sem er um 180 sm á hæð, var á vappi fyrir utan verslunina nokkru áður en hann lét til skarar skríða. Maðurinn hótaði starfsmanninum sem rétti honum þá peninga sem í kassanum voru og hafði hann þá á brott með sér. Samkvæmt upplýsingum frá lögreglu leikur grunur á að hann hafi einnig farið inn í fleiri hús á svæðinu.



Lambúshettan og felgulykillinn fundust skammt frá versluninni en tæknideild lögreglu rannsakaði vettvanginn í gær. Ræningjans er enn leitað og engar nánari upplýsingar hafa borist.



Sigurður hefur rekið verslunina í tuttugu og fimm ár en þetta er í fyrsta skipti sem hún er rænd. Verslunarreksturinn er þó sérstakur að því leyti að aðeins er tekið við reiðufé. Sigurður segir að þjófurinn kunni að hafa haft meira upp úr krafsinu vegna þessa en vildi ekki gefa upp nákvæma upphæð.



Sigurður hyggst þrátt fyrir ránið ekki breyta starfsháttum sínum og getur ekki hugsað sér að taka á móti greiðslukortum.



„Ég hef engan áhuga á að styrkja bankana, ég vil bara styrkja fólkið,“ segir hann.