Munnleg skýrsla um makríldeiluna klukkan þrjú

Ráðherra úr ríkisstjórn Íslands mun taka til máls á Alþingi klukkan 15 vegna stöðu mála í makríldeilunni.

Einar K. Guðfinnsson, forseti Alþingis, tilkynnti þetta á þingfundi í morgun. Ekki liggur ljóst fyrir hvaða ráðherra úr ríkisstjórninni mun flytja þingmönnum skýrsluna.

Sigurður Ingi Jóhannsson, sjávarútvegsráðherra, var ómyrkur í máli í viðtali við Vísi í gærkvöldi. Íslendingar hefðu ávalt lagt áherlsu á að samkomulagið myndi fylgja vísindalegri ráðgjöf.

„Ég tel það ljóst að Noregur hafi aldrei ætlað að semja um þann hlut sem Ísland getur sætt sig við né um veiðar á grundvelli ráðgjafar. Það var því smjörklípa þeirra á síðasta strandríkjafundi að ræða veiðar Grænlendinga og hvernig mætti koma í veg fyrir að Grænland geti nýtt það tækifæri sem við þeim blasir með aukinni göngu makríls í þeirra lögsögu til að byggja upp sínar fiskveiðar.“

„Þetta leiddi m.a. til þess að ESB hvarf frá því samkomulagi sem Ísland og ESB höfðu og Noregur gat þar með komið í veg fyrir samning á þeim grundvelli og náð fram sinni kröfu um veiðar meira en helming fram úr ráðgjöf.“

Fylgjast má með beinni útsendingu frá Alþingi hér á Vísi.