Árni spyr hvort Bjarna sé alvara

Formaður Samfylkingarinnar segir tilgangslaust að kjósa um það í þjóðaratkvæðagreiðslu hvort draga eigi umsókn Íslands að Evrópusambandinu tilbaka og spyr hvort að formanni Sjálfstæðisflokksins sé alvara.

Flokkráðsfundur Samfylkingarinnar fór fram á Hótel Natura í dag og fór formaður flokksins nokkuð hörðum orðum um störf ríkisstjórnarinnar. Árni Páll sagði í ræðu sinni að ríkisstjórnin hyglaði þeim sem ríkastir eru, mismunaði atvinnugreinum og ynni gegn atvinnufrelsi.

Bjarni Benediktson fjármálaráðherra sagði í samtali við kvöldfréttir Stöðvar 2 í gær að hugsanlegt væri að boða til þjóðaratkvæðagreiðslu um að draga aðildarumsókn Íslands að Evrópusambandinu til baka. Árni Páll spyr hvort fjármálaráðherra sé alvara.

„Þjóðaratkvæðagreiðsla um þessa tillögu gengur ekki upp. Því þá er enginn valkostur á borðinu fyrir fólk. Fólk getur bara valið á milli þess að hætta við að halda áfram eða draga umsóknina til baka. Það sér það hver maður að þeir kostir ganga ekki upp,“ segir Árni Páll.

„Það sem fólkinu var lofað var að það fengi að ákveða um framtíðina. Á að halda áfram eða ekki? Sá valkostur verður að vera í boði ef þjóðin er spurð.“

Árni Páll sagði í ræðu sinni í dag að óþol ríkti meðal íslendinga gagnvart hinnar gömlu íslensku stjónmálahefðar. Íslendingar láti nú í sér heyra þegar óánægja sé með störf ríkisstjórnarinnar. Þetta hafi forystumenn ríkisstjórnarinnar ekki áttað sig á og því hafi þeir magalent úti í mýri eins og formaður Samfylkingarinnar orðaði það í ræðu sinni.

„Það er ekki umburðarlyndi fyrir yfirgangi. Ég held að þjóðin sé í grundvallaratriðum þeirrar skoðunar að hún sé betur til þess fallin að taka ákvörðun um eigin framtíð en Sigmundur eða Bjarni,“ sagði Árni Páll.