80% færri deyja úr hjartasjúkdómum, þrátt fyrir aukna offitu

Árið 1981 létust 247 Íslendingar á aldrinum 25 til 74 ára vegna kransæðasjúkdóma en árið 2006 voru dauðsföllin 79. Ef dánartíðnin hefði haldist óbreytt hefðu dauðsföllin árið 2006 orðið 374 svo mismunurinn er 295 manns, eða 80%. Í meðfylgjandi myndskeiði sést hvernig nýjum tilfellum kransæðastíflu hefur fækkað um 63% yfir sama tímabil.

Þessi árangur hefur náðst þrátt fyrir að þjóðin hafi fitnað mikið og þar segir Laufey Steingrímsdóttir, prófessor í næringarfræði, neyslugleði um að kenna. „Þegar við kaupum mikið af græjum, tólum og tækjum enda þau kannski á ruslahaugunum en það sem við borðum of mikið af, sest utan á okkur,“ segir hún.

Framfarir í læknisfræði og fleira hefur haft jákvæð áhrif en þyngst vega heilsusamlegri lífshættir. Við reykjum minna, hreyfum okkur meira og höfum aukið neyslu á grænmeti og ávöxtum en dregið úr neyslu á óhollri matvöru.

Nú eftir hátíðarnar hyggjast margir taka sig á og undanfarið hefur lágkolvetnamataræði notið mikilla vinsælda. Laufey segir það geta gagnast sumum sem missa þurfi þyngd. „Það sem er alvarlegt hins vegar að mínu mati er þegar þetta er boðað sem lífsstíll og fólk fer að rugla þessu saman við heilsusamlegt mataræði. Það er í raun stóralvarlegt mál.“

Með lágkolvetnafæðu hefur neysla á feitmeti aukist aftur og Laufey nefnir til dæmis feitar mjólkurvörur og smjör. „Mér finnst umhugsunarefni hvort fólk vili virkilega fara aftur í fyrra horf þegar þessi glæsilegi árangur hefur náðst.“

Hún minnir á að rétta leiðin sé að sleppa gosi, sælgæti og kökum. „Það er heilsusamlegt lágkolvetnafæði,“ segir Laufey.