Íslenskir krabbameinssjúklingar neyta kannabisefna við verkjum

Dæmi eru um að krabbameinssjúklingar hér á landi nota kannabisefni til að deyfa verki sem sjúkdómnum fylgja.

„Kannabisefni koma stundum við sögu og í einu mjög sérstöku tilfelli, að vel ígrunduðu máli og þegar hefðbundin úrræði virkuðu ekki, höfum við hjálpað einstaklingi við að verða sér út um löglegt lyf sem inniheldur kannabis og er ekki markaðssett hér á landi,“ segir Þórunn K. Guðmundsdóttir, klínískur lyfjafræðingur hjá Landspítalanum.

„Einstaka sinnum segist fólk vera að nota marijúana eða sambærileg lyf, sem þau verða sér út um á ólöglegum markaði. Þannig að það eru jú einhver tilfelli. Ég veit ekki hve algengt það er en fólk spyr oft hvort það sé gagn af þessu,“ segir Þórunn. Þá hafi krabbameinssjúklingar spurt fagaðila hvort þau þurfi að fara á svarta markaðinn til að verða sér út um kannabisefni og með því brjóta lög.

Lögleiðing kannabisefna í Coloradoríki í Bandaríkjunum hefur vakið mikla athygli að undanförnu, en marijúna hefur lengi verið notað sem stuðningslyf af sjúku fólki. Þá er það notað gegn sársauka, ógleði og uppköstum og einnig til að auka matarlyst.

„Það er mjög misjafnt hverjum þetta gagnast, sumum gagnast þetta en öðrum ekki. Mér finnst líka óljóst af hverju fólk er að nota þetta. Að mestu eru kannabisefni notuð til að vinna gegn ógleði og uppköstum og til að auka matarlyst. Það eru þó til mörg önnur úrræði sem virka betur,“ segir Þórunn.

Gunnar Bjarni Ragnarsson, krabbameinslæknir, segist ekki vera hrifinn af notkun marijúana sem stuðningslyfi fyrir krabbameinssjúklinga. „Það er mikið talað um að nota marijúana í lækningaskyni, en þetta læknar ekki eitt né neitt því er það rangnefni.“

„Í það heila er ekkert sérstaklega góð reynsla af marijúana sem stuðningsmeðferð hjá krabbameinssjúkum eins og til dæmis gegn ógleði. Það eru til önnur lyf sem eru mun betri og það fylgja talsverðar aukaverkanir notkun marijúana sérstaklega hjá þeim sem ekki hafa notað það áður. Það er til í töfluformi og það hefur verið notað hérna heima, en af því var ekkert sérstaklega góður árangur.“