Skíðagöngufólk í stóru hlutverki

Í fyrsta skipti í 20 ár eiga Íslendingar fulltrúa í skíðagöngu á Vetrarólympíuleikum þegar Sauðkrækingurinn Sævar Birgisson keppir í sprettgöngu og 15 km skíðagöngu. Skíðagöngugreinar og skíðaskotfimi njóta alltaf mikilla vinsælda á Vetrarólympíuleikunum auk þess sem skíðaganga nýtur sífellt meiri vinsældar hérlendis.

Jakob Einar Jakobsson mun lýsa greinunum á Stöð 2 Sport og býst hann við skemmtilegri og spennandi keppni. „Þessar greinar eru mjög sjónvarpsvænar íþróttir. Mikið er lagt upp úr allri myndvinnslu þannig að keppnin skili sér sem best heim til sjónvarpsáhorfenda. Það má einnig geta þess að skíðaskotfimi er önnur vinsælasta sjónvarpsíþróttin í Þýskalandi á eftir knattspyrnu og á undan Formúlunni. Skíðaganga og skíðaskotfimi geta verið ótrúlega spennandi greinar og mikið er lagt á keppendur.“

Keppt er í sex greinum karla og kvenna í skíðagöngu og fimm í skíðaskotfimi auk blandaðrar boðgöngu. „Sprettgangan sem Sævar keppir í er til dæmis virkilega spennandi og skemmtileg grein. Keppt er með útsláttarfyrirkomulagi þar sem allir keppendur byrja á því að skíða einn hring með 15 sekúndna millibili. Efstu 30 keppendurnir komast svo áfram og keppa í fimm riðlum þar sem sex keppendur keppa í braut. Tveir bestu í hverjum riðli fara svo áfram í undanúrslit og þannig koll af kolli.“

Aðspurður um möguleika Sævars segir Jakob vont að spá um þá. „Hann er auðvitað að keppa við gríðarlega sterka keppendur en honum hefur þó gengið vel á mótum undanfarið. Hann var meðal annars einn af fimmtán efstu á sterku móti í Svíþjóð fyrr í vetur. Á góðum degi gæti hann alveg komist inn í 30 manna úrslitin.“

Að sögn Jakobs verða heimamenn vafalaust mjög sterkir í greinunum tveimur. „Rússar hafa ekki mikið látið fyrir sér fara í Heimsbikarnum í vetur sem segir manni að það er örugglega svakalegt prógram í gangi hjá þeim til að toppa sig á heimavelli. Norðmenn eru efstir á heimslistanum í skíðagöngu en tveir efstu karlar og fjórar efstu konur koma þaðan. Auk þessara þjóða má búast við sterkum keppendum frá Svíþjóð og Tékklandi.“