Léttir sprettir og réttir

Léttir sprettir er nýr þáttur sem Friðrika Hjördís Geirsdóttir, eða Rikka eins og hún er kölluð, stjórnar og hefst hann 12. febrúar.



„Þátturinn fjallar um þær íþróttir sem almenningur stundar helst. Fyrst og fremst er hann gerður til að koma fleirum af stað til að hreyfa sig. Hreyfing hefur góð og jákvæð áhrif bæði á líkama og sál. Þeir sem hreyfa sig reglulega eru jákvæðari og líður betur í sjálfinu, þetta jákvæða viðhorf til lífsins smitast svo út frá þeim til samfélagsins. Rauði þráðurinn í þættinum er því að hvetja fólk til að finna íþrótt sem hentar viðkomandi og bera með því ábyrgð á eigin heilsu og betra samfélagi án þess þó að vera með einhverja predikun,“ segir Rikka.

Ein íþrótt í hverjum þætti

Hver þáttur verður tileinkaður einni íþrótt og kemur Rikka til með að kynna sér til dæmis hlaup, skíðaíþróttir, hjólreiðar, fjallgöngur, sund, íþróttir fyrir alla fjölskylduna, krossfit og jóga, sem og aðrar íþróttir sem eiga upp á pallborðið. „Í þættinum verður farið yfir þann búnað sem nauðsynlegur er í hverri íþrótt og hvernig þjálfun er æskileg til að ná betri árangri. Einnig verður farið yfir hvernig byrjendur geta stundað þá íþrótt sem til umfjöllunar er og líka hvernig þeir sem eru lengra komnir geta farið enn lengra í sinni iðkun.“

Líka næring og matur

Í þættinum verður einnig lögð áhersla á næringu og hinum ýmsu spurningum varðandi hana svarað. „Ég er búin að fá frábæran strák með mér í þættina sem er lektor í næringarfræði í Háskóla Íslands og við ætlum að spjalla um hitt og þetta. Til dæmis um vítamínnotkun, prótínnotkun og næringu fyrir börn.“

Í lok þáttanna verður svo matreiddur hollur réttur sem er stútfullur af næringarefnum.