Fjöldi mála kemur ekki á óvart

Rannsóknarnefnd Alþingis um fall sparisjóðanna tilkynnti 21 mál sem varðað geta fangelsisrefsingu til ríkissaksóknara.

Ólafur Þór Hauksson, sérstakur saksóknari, segir fjöldann ekki koma á óvart. „Ekki miðað við það sem við vissum þegar.“

Sérstakur saksóknari hefur samanlagt verið með um tíu til tólf auðgunarbrotamál sem tengjast sparisjóðunum á sinni könnu.

„Eitthvað af þessu er tengt þessum málum sem þau hafa tilkynnt um, önnur eru ný,“ segir Ólafur Þór. „Tvö eru farin í gegnum allt kerfið en að minnsta kosti fjögur til sex eru í rannsóknarfasanum eða á leiðinni inn í hann.“

Fjármálaeftirlitið fékk upplýsingar um mál þar sem grunur lék á um brot gegn lögum um fjármálafyrirtæki. Hrannar Hafberg, formaður rannsóknarnefndarinnar, sagði yfirvöld verða að meta hvort atriðin kölluðu á frekari rannsókn. „Hugsanlega kunna einhver þeirra mála sem tilkynnt voru til yfirvalda að vera fyrnd, kunna þegar að vera til rannsóknar eða rannsóknum kann að vera hætt.“