Binoche í viðræðum um hlutverk í Godzilla

Franska Óskarsverðlaunaleikkonan Juliette Binoche á í viðræðum um að taka að sér hlutverk í Godzilla-myndinni sem áætlað er að taka upp í vor og sumar og frumsýna á næsta ári.

Það er breski leikstjórinn Gareth Edwards sem hyggst gæða hið goðsagnakennda skrímsli nýju lífi í stórmynd sem framleidd verður af Legendary Pictures í samstarfi við Warner Bros. Edwards vakti fyrst verulega athygli fyrir vísindamyndina Monsters frá 2010 og eru bundnar miklar vonir við hann í Hollywood. Edwards, sem er fæddur árið 1975, hefur ítrekað látið hafa eftir sér í viðtölum að Stjörnustríðsmyndirnar séu ástæða þess að hann gerðist kvikmyndagerðarmaður.

Enn sem komið er hefur fátt verið staðfest um leikaraval og söguþráð í nýju Godzilla-myndinni. Fyrir utan Binoche hefur þó gengið fjöllunum hærra að breski leikarinn Aaron Taylor-Johnson, sem lék John Lennon í Nowhere Boy, Elizabeth Olsen, yngri systir Olsen-tvíburasystranna, og Bryan Cranston úr Breaking Bad og Malcolm in the Middle-þáttunum, séu á óskalista leikstjórans fyrir myndina.