Harpa Einars í útrás

Lífið greindi frá því nýlega að listakonan Harpa Einarsdóttir og fatahönnuðurinn Ýr Þrastardóttir ætli að sameina krafta sína og vinna saman að nýju tískumerki sem mun bera nafnið Y-Z. Afrakstur þess samstarfs mun líta dagsins ljós á næstu mánuðum. Þar að auki virðist allt benda til þess að nýjasta lína í Zisku fatalínu Hörpu verði framleidd í Los Angeles.

Harpa, sem er nýkomin frá Los Angeles þar sem hún ræddi við áhugasama framleiðendur, verður í Ísþjóðinni með Ragnhildi Steinunni í kvöld í Sjónvarpinu en þar ræðir Harpa opinskátt um sorgir sínar og sigra í lífinu.

Harpa lærði fatahönnun í Listaháskóla Íslands og fór á öðru ári í starfsnám hjá New York merkinu threeASFOUR. Eftir LHÍ vann hún á búningadeild Þjóðleikhússins. Síðar fór hún til CCP þar sem hún teiknaði og hannaði útlit fyrir EVE online leikinn. Harpa fluttist síðan vestur um haf til Atlanta þar sem hún var yfirhönnuður útlits í leiknum World of Darkness.

Harpa verður í þættinum Ísþjóðin - með Ragnhildi Steinunni í kvöld.