Fólk drekkur bjórinn fallegar

„Bjórinn er alltaf að sækja meira og meira í sig veðrið, þá helst þessir sérstöku bjórar. Karlar og konur sýna þessu mikinn áhuga og hafa gaman af því að smakka góðan bjór,“ segir Böðvar Guðjónsson, talsmaður Kex hostels. Kexið fagnar 24 ára afmæli bjórsins með bjórhátíð sem hefst í dag og stendur til laugardags. Fjöldi brugghúsa, þar af tvö erlend, mun kynna vörur sínar á hátíðinni.

Meðal þeirra brugghúsa sem taka þátt eru Migration Brewing Co. frá Portland, danska brugghúsið Mikkeller og íslensku brugghúsin Einstök, Vífilfell, Borg, Ölgerðin, Ölvisholt, Kaldi og áhugabruggararnir í Fágun. Hvert þeirra mun kynna vörur sínar á milli klukkan 17 og 19 þá daga sem hátíðin stendur og er gestum einnig boðið að smakka nýjungar. Sérstakur matseðill var settur saman fyrir veitingastaðinn Sæmund í sparifötunum, en réttirnir eiga að kallast á við þá bjóra sem eru á boðstólnum yfir hátíðina.

Böðvar telur bjórdrykkju landans hafa breyst töluvert með auknum áhuga á sérbrugguðum bjór. „Fólk fær sér heldur einn góðan bjór og gerir það fallega og vel. Við á Kexinu erum miklir bjóráhugamenn og veljum bjórinn inn í stíl við matinn sem við bjóðum upp á.“

Dagskráin hefst klukkan 17 dag hvern fram að laugardegi. - sm