Colin Stetson til Íslands

Bandaríski saxófónleikarinn Colin Stetson spilar á Volta 17. mars. Stetson, sem er frá Michigan-fylki Bandaríkjanna, hefur gert út frá Montreal í Kanada undanfarin ár. Hann hefur starfað með Arcade Fire, Tom Waits, TV on the Radio, Bon Iver, LCD Soundsystem, The National, David Byrne og Feist. Hann hefur gefið út fjórar sólóplötur og í fyrra kom svo út samstarfsplatan Stones með sænska saxófónleikaranum Mats Gustafsson. Fimmta plata hans kemur svo út 30. apríl. Miðasala á tónleikana á Volta hefst á Midi.is á föstudaginn.