Skaut strútinn af 170 metra færi

„Það sem er sérstakt er að hann var felldur með skammbyssu á 170 metra færi,“ segir Páll Reynisson hjá Veiðisafninu á Stokkseyri.

Strútur sem hann veiddi í Suður-Afríku árið 2010 er loksins kominn til Íslands ásamt sex öðrum uppstoppuðum dýrum sem hann veiddi. Strúturinn, sem er tveggja metra hár, er í heilu lagi rétt eins og krókódíll sem hann veiddi. Óvenjulegt er að strútar séu til sýnis hér á landi.

„Ég veit ekki um neinn annan uppstoppaðan strút í heilu lagi á Íslandi en ég veit að menn sem hafa veitt strúta hafa tekið fjaðrir.“

Vanalega tekur það Pál eitt og hálft ár að fá dýr til landsins eftir að hann hefur látið stoppa þau upp. „Svo skeður það að þeir skrifa eftirnafnið mitt vitlaust á einhverja pappíra á skrifstofu í Suður-Afríku og það tók fjóra mánuði að leiðrétta það. Þá byrjar vitleysan og það tekur tvö ár að fá þessa sendingu heim,“ segir hann.

Í sýningarsali safnsins eru líka komnir fjórir frampartar af antilópum og einnig er uppsettur frampartur af mjög stórum nashyrningi sem tekið var plastmót af. Nashyrninginn skaut Páll með sérsmíðuðum riffli sem skýtur deyfipílum og var um svokallaða björgunarveiði að ræða. Nashyrningurinn er enn þá lifandi en tekin voru af honum hornin svo forða megi honum frá veiðiþjófum sem stunda ránsveiðar á nashyrningum til að vinna duft úr hornum þeirra.

Veiðisafnið verður opið alla páskana frá klukkan 11 til 18.