Brotið á dreng þar sem hann átti að vera öruggur

Kynferðisbrot gagnvart fimmtán ára unglingspilti hefur verið kært til lögreglunnar á höfuðborgarsvæðinu.

Meint kynferðisbrot á að hafa átt sér stað á neyðarvistun meðferðarheimilisins Stuðla síðustu helgi og eru tveir piltar grunaðir um verknaðinn.

Barnaverndarstofa hefur óskað eftir óháðri rannsókn velferðarráðuneytisins á málinu. Forstjóri Barnaverndarstofu, Bragi Guðbrandsson, segir starfsmenn heimilisins ekki sérstaklega grunaða um að hafa brugðist starfsskyldum sínum en að það verði kannað eins og málið í heild sinni.

Brotið sem um ræðir á að hafa átt sér stað síðasta laugardag. Allir piltarnir voru í neyðarvistun Stuðla en það er neyðarúrræði þar sem unglingar eru vistaðir í bráðatilvikum til að tryggja öryggi þeirra vegna meintra afbrota, vímuefnaneyslu eða alvarlegra hegðunarerfiðleika.

Það eru barnaverndarnefndir og lögregla í samráði við barnaverndarnefnd sem geta vistað ungling á lokaðri deild.

„Þetta var samstundis tilkynnt til lögreglu,“ sagði Bragi og bætir við að foreldrum og viðkomandi barnaverndarnefndum hafi einnig verið tilkynnt um málið. Daginn eftir meint brot hafði Bragi svo samband við félagsmálaráðuneytið og óskaði eftir óháðri úttekt á atburðarásinni og varð ráðuneytið við þeirri beiðni. Enn á þó eftir að ákveða hver fer með þá rannsókn.

„Það verða því tvær sjálfstæðar rannsóknir á málinu, enda tökum við þetta mjög alvarlega,“ sagði Bragi. Aðspurður um eftirlit í neyðarvistun á Stuðlum svarar Bragi því til að það sé einmitt eitt af því sem verður kannað.

„Þarna á vera mikið eftirlit, enda eiga ungmennin að vera örugg í þessu umhverfi.“

Bragi ítrekar einnig að menn eigi að varast að draga ályktanir í þessu máli. „Það er mjög ótímabært að draga ályktanir af fyrstu fregnum,“ undirstrikar Bragi og bætir við málið sé viðkvæmt.

Hinn meinti þolandi er ekki lengur vistaður á stofnuninni. Samkvæmt upplýsingum frá lögreglu er kynferðisbrotið gagnvart piltinum í rannsókn og ekki var hægt að gefa upp nánari upplýsingar um málið.