Segir gíslatökuna hafa kostað 240 manns lífið

„Við höfum niðurlægt og sigrast á árásarmönnunum,“ sagði Uhuru Kenyatta, forseti Kenía í ávarpi til þjóðar sinnar í gær, eftir að her og lögregla landsins hafði unnið bug á gíslatökumönnum í verslunarmiðstöð í Naíróbí.

Hann sagði fjögurra daga átök við hryðjuverkamenn hafa kostað 240 manns lífið. Þar af hafi fimm hryðjuverkamenn látist, en ellefu verið handteknir.

Hann skýrði einnig á því að þrjár hæðir í Westgate-verslunarmiðstöðinni hafi hrunið og töluvert mörg lík séu enn föst í rústunum.

Hann hótaði árásarmönnunum öllu illu: „Þessar raggeitur munu fá að kynnast réttlætinu, rétt eins og samverkamenn þeirra og stuðningsmenn, hvar svo sem þeir leynast.“

Hópur vopnaðra manna réðst inn í verslunarmiðstöðina á laugardag og hélt fólki þar í gíslingu þar til kenískar öryggissveitir lögðu til atlögu gegn þeim á mánudag.

Al Shabab, samtök herskárra íslamista í Sómalíu, hafa lýst yfir ábyrgð á árásinni, sem gerð sé í hefndarskyni fyrir árásir kenískra hermanna í Sómalíu.