Silvía Svíadrottning sökuð um þöggun

Silvía Svíadrottning er í nýrri bók, Drottningens hemlighet, harðlega gagnrýnd fyrir að draga úr aðgerðum föður síns á tímum nasista í Þýskalandi. Bókin er eftir sjónvarpsfréttamanninn Johan Åsard og er framhald á þáttum sjónvarpsstöðvarinnar TV4 um drottninguna og föður hennar, Walther Sommerlath, í nóvember 2010.

Í sjónvarpsþáttunum kom fram að Sommerlath hefði árið 1934 gengið í flokk nasista og árið 1939 tekið yfir verksmiðju í Berlín sem var í eigu gyðingsins Efim Wechsler sem síðan flúði frá Þýskalandi til Brasilíu.

Í frétt á vef Dagens Nyheter segir að drottningin hafi fengið ríkisskjalavörð Svíþjóðar til að kanna málið og hlutverk föður hennar. Í kjölfarið sagði Silvía að faðir hennar og gyðingurinn hefðu gert með sér viðskiptasamning. Faðir hennar hefði fengið verksmiðjuna og gyðingurinn jörð í Brasilíu í skiptum. Faðir hennar hefði auk þess hjálpað Wechsler við að flýja frá Þýskalandi.

Í bók sinni greinir sjónvarpsfréttamaðurinn frá gögnum sem sýna að gyðingurinn hafi fengið vegabréfsáritun til Brasilíu mörgum mánuðum áður en samningurinn var gerður. Auk þess hafi verðið fyrir fyrirtækið verið langt undir markaðsvirði þess. Jafnframt kemur fram að drottningin hafi ritað áhrifamiklum persónum fjölda bréfa í því skyni að beita gagnrýnendur þrýstingi.