Játaði brot gegn tíu ára telpu fyrir dómi

Maður á fertugsaldri játaði fyrir dómi á miðvikudag að hafa numið tíu ára stelpu á brott úr Vesturbæ Reykjavíkur í maí, ekið með hana upp í Heiðmörk og brotið þar gegn henni kynferðislega eins og honum er gefið að sök í ákæru.

Við þingfestingu málsins 5. september neitaði maðurinn sök. Hann hefur frá upphafi fullyrt að sökum neyslu og lítils svefns muni ekkert eftir þessu síðdegi, þegar hann þvingaði stúlkuna upp í bíl sinn þar sem hún var á leið heim úr Melaskóla og skilaði henni síðan aftur á svipaðar slóðir eftir að hafa brotið gegn henni.

Aðalmeðferð málsins fór fram fyrir luktum dyrum á miðvikudag. Samkvæmt heimildum Fréttablaðsins hélt maðurinn sig staðfastlega við það að hann myndi ekkert, en breytti hins vegar framburði sínum á þann veg að nú gekkst hann við öllum sakargiftunum. Hans mat var það að sönnunargögnin gegn honum væru svo ótvíræð að það stoðaði ekkert að efast um að hann hefði gerst sekur um brotið.

Vegna þess að maðurinn játaði var aðalmeðferðin stytt til mikilla muna og vitnum fækkað. Helstu vitnin sem kalla þurfti fyrir dóminn voru sérfræðingar; sálfræðingar og aðrir.

Maðurinn, sem er rúmlega þrítugur Breiðhyltingur og með nokkra dóma fyrir auðgunarbrot á bakinu, hefur setið í gæsluvarðhald síðan málið kom upp.

Fram hefur komið að þegar hann var handtekinn fannst í fórum hans miði með nöfnum nokkurra barna til viðbótar. Ekki liggur fyrir hvað hann ætlaðist fyrir með þau börn, ef nokkuð. Meðal þess sem var rannsakað var hvort maðurinn hefði komist yfir upplýsingar um börnin og ferðir þeirra símum foreldranna í starfi sínu hjá farsímaviðgerðarþjónustu.