Endurkoma aldarinnar hjá íslenska landsliðinu

Áhorfendur bauluðu og sátu furðu lostnir á Stade de Suisse í gær eftir að íslenska landsliðið nældi í 4-4 jafntefli á lygilegan hátt. Strákarnir áttu stigið fyllilega skilið eftir stórkostlega frammistöðu.

Íslenska liðið byrjaði leikinn með miklum látum. Setti heimamenn undir pressu og þeir höfðu varla snert boltann er Ísland komst yfir. Gylfi átti þá flotta sendingu í teiginn sem Jóhann Berg tók við. Hann var ekkert að tvínóna við hlutina heldur negldi boltanum upp í skeytin. Stórkostlegt mark og ótrúleg byrjun á leiknum.

Hið sókndjarfa lið Svisslendinga lét markið ekki slá sig út af laginu og hóf mikla sókn að marki Íslands. Þeir voru þó ekki að skapa nein opin færi. Eftir um 14 mínútna leik jafnaði þó Lichtsteiner metin. Hann lenti þá í skallaeinvígi við honn smávaxna Ara Frey í teignum og var ekki í miklum vandræðum með að skora.

Íslenska liðið brást við þessu marki af kjarki og hóf að pressa á nýjan leik. Það var nokkuð gegn gangi leiksins að Schär skyldi koma Sviss yfir. Markið var af ódýrari gerðinni eftir að íslenska liðinu mistókst að hreinsa frá marki.

Skömmu síðar veitti hinn magnaði bakvörður Juventus, Lichtsteiner, Íslandi mikið rothögg með sínu öðru marki. Hann og Shaqiri náðu að tvímenna á bakvörðinn og Lichtsteiner skoraði með mögnuðu skoti. Íslenska liðið var búið að fara sérstaklega yfir þetta atriði en þarna brást skipulagið algjörlega.

Snemma í síðari hálfleik lét Birkir sóla sig upp úr skónum og síðan braut hann klaufalega af sér.

Dzemaili fór á punktinn og skoraði örugglega. Niðurlæging í uppsiglingu í Bern. Kolbeinn Sigþórsson var þó ekki hættur og skoraði mark upp úr frábæru einstaklingsframtaki.

Eiður Smári kom af bekknum í hálfleik. Líkt og venjulega kom nýtt líf í sóknarleik liðsins með hans innkomu. Strákarnir voru alltaf líklegir í sínum sóknarlotum og Jóhann Berg minnkaði muninn í eitt mark rúmum 20 mínútum fyrir leikslok.

Aftur átti Gylfi stoðsendinguna og Jóhann kláraði færið sitt aftur með stæl. Það var enn von gegn liðinu sem var aðeins búið að fá á sig eitt mark fyrir þennan leik.

Það var eitthvað í loftinu. Strákarnir héldu áfram að pressa og tóku völdin á vellinum. Það bar árangur í uppbótartíma er Jóhann Berg fullkomnaði þrennuna með enn einu stórkostlega markinu. Ótrúleg frammistaða hjá íslenska liðinu í þessum leik sem seint mun gleymast.

Strákarnir sýndu kjark, þor og ódrepandi baráttuanda en var refsað grimmilega af frábæru liði. Þessi leikur kenndi okkur þó að varnarleikurinn er langt frá því að vera nógu góður og mennirnir í vörninni eru sumir hverjir einfaldlega ekki nógu góðir. Þeir eru númeri of litlir. Íslenska liðið er í raun eins og tvö lið. Frábært sóknarlið og lélegt varnarlið.

Þessi eldmóður og trú sem íslenska liðið sýndi í gær er til marks um nýja tíma. Þetta lið kom á erfiðan útivöll, hætti aldrei og uppskar eins og það sáði að lokum. Ógleymanleg frammistaða hjá íslenska liðinu, sem hefur ekki sagt sitt síðasta í þessari keppni.