Innlent

Segir slitastjórnina „djöflast“ á Sigurjóni

Valur Grettisson skrifar
Slitastjórn Landsbankans krefur Sigurjón og fyrrverandi stjórnendur bankans um tugi milljarða.
Slitastjórn Landsbankans krefur Sigurjón og fyrrverandi stjórnendur bankans um tugi milljarða.

DómsmálSlitastjórn Landsbankans krefst 65 milljarða samanlagt í skaðabætur frá Sigurjóni Þ. Árnasyni, fyrrverandi bankastjóra Landsbankans.

Fyrirtaka fór fram í riftunarmáli þrotabúsins gegn Sigurjóni í gær, en það mál hefur verið að velkjast um í kerfinu í um þrjú ár og hefur einu sinni verið vísað frá.
Stjórnin hefur höfðað þrjú stór skaðabótamál gegn stjórnendum Landsbankans fyrir Héraðsdómi en eitt þeirra bíður afgreiðslu Hæstaréttar Íslands. Skaðabótakröfur sem beinast að Sigurjóni eru um 65 milljarðar samkvæmt lögfræðingi hans, Sigurði G. Guðjónssyni.

Nú í gærmorgun fór að auki fram enn ein fyrirtakan í riftunarmáli bankans gegn Sigurjóni þar sem krafist er þess að launagreiðslum bankans til fyrrverandi bankastjórans upp á 300 milljónir króna verði rift.

„Það er verið að djöflast á þessum mönnum, en þá gleymist á sama tíma að slitastjórnirnar þurfa að ráða lögfræðinga, sem ráða algjörlega sínu tímakaupi og kostnaðurinn verður að lokum meiri en heimtur,“ segir Sigurður um skaðabótamálin. Hann segir málareksturinn tilgangslausan „enda alveg ljóst fyrir að Sigurjón er enginn borgunarmaður fyrir þessu“.

Auk Sigurjóns hefur Halldór J. Kristjánsson, sem var einnig bankastjóri gamla Landsbankans, verið krafinn um skaðabætur. Eins hefur stjórn bankans verið stefnt, en meðlimir hennar eru krafðir samanlagt um 46 milljarða í skaðabætur.

Stærsta málið sem snýr að fyrrverandi bankastjórum Landsbankans er enn í meðförum Héraðsdóms Reykjavíkur. Þar er krafist 37 milljarða í skaðabætur.

Sigurður segir málin fjarstæðukennd og bætir við að hans upplifun sé sú að aðrar hvatir séu á bak við stefnurnar en að endurheimta fé fyrir þrotabúið.

Páll Benediktsson, upplýsingafulltrúi Slitastjórnar Landsbankans, svarar aðspurður að ekki sé búið að taka saman kostnað vegna málaferlanna. Hann segist ekki búast við því að slíkar upplýsingar verði sundurliðaðar.

„En menn telja, eftir að hafa skoðað málin gaumgæfilega, meðal annars hvernig haldið var á málum í bankanum fyrir hrun, að þar beri stjórnendur ábyrgð og hafi valdið bankanum tjóni með sinni starfsemi. Og það er bara verið að reyna að fá skaðabætur vegna þessa,“ segir Páll.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.