Viðræðuhlé stoppaði 1,4 milljarða í styrki

Fjárveitingar Evrópusambandsins (ESB) í formi styrkja hingað til lands eru allar í biðstöðu eftir að íslensk stjórnvöld ákváðu að gera hlé á aðildarviðræðunum.

ESB auglýsti eftir umsóknum fyrir 8,3 milljónir evra, eða um 1,4 milljarða íslenskra króna, í lok síðasta árs.

Hallgrímur Jónasson, forstöðumaður Rannís, segir allt ferlið í biðstöðu og boltann vera hjá stjórnvöldum. „Við vitum ekkert hvenær verður gengið frá þessum styrkjum,“ segir hann. „Við hefðum gert ráð fyrir því að það væri búið að greiða þetta út á þessum tímapunkti.“

Umsóknarfrestur vegna styrkjanna rann út í nóvember í fyrra en það liggur fyrir hvaða verkefni verða valin ef féð verður greitt út. Ekki er búið að gera samninga og skrifa undir skjöl um einstök verkefni og ekki liggur enn fyrir hvort það verði nokkurn tímann gert. Hallgrímur vill þó ekki gefa upp hvaða verkefni hafi orðið fyrir valinu.

Gunnar Bragi Sveinsson utanríkisráðherra sagði í samtali við Fréttablaðið í síðustu viku að ráðuneytið væri nú að skoða hvaða verkefni væru beintengd viðræðunum og hver ekki. Þeim sem hægt væri að tengja beint við viðræðurnar yrði ekki haldið til streitu en styrkir frá ESB yrðu þegnir fyrir önnur verkefni.

„Það er ljóst að styrkirnir geta nýst okkur að einhverju leyti sem EES-ríki en þarna eru líka verkefni sem eru beintengd aðildarumsókninni og hvert verkefni verður metið fyrir sig,“ sagði Gunnar Bragi.

Auglýst var eftir verkefnum sem voru á sviði atvinnuþróunar- og byggðamála og velferðar- og vinnumarkaðsmála. Stefnt var að því að verja öllum 8,3 milljónunum til allt að tuttugu verkefna um land allt í ár, en þau áttu að taka mið af „Ísland 2020“ stefnumörkuninni. Lágmarksstyrkur til hvers verkefnis átti að vera 200 þúsund evrur og hámarkið ein milljón.