Hressir þættir um íslenskt mál

„Við erum að fara að vaða í tökur á þessu. Við ætlum að gera þetta eins skemmtilegt og við mögulega getum,“ segir Bragi Valdimar Skúlason. Hann og Brynja Þorgeirsdóttir stjórna sjónvarpsþættinum Orðbragð sem fer af stað í Sjónvarpinu í haust.

Leikstjóri og framleiðandi er Konráð Pálmason. Bragi hefur undanfarið stjórnað þættinum Tungubrjótur á Rás 1 þar sem íslenskt mál hefur verið krufið til mergjar.

Sá þáttur er á leið í sumarfrí og verður Orðbragð að einhverju leyti byggður á honum.

„Þetta verður ekki Tungubrjótur. Við ætlum að leyfa honum að hírast á Rás 1 en við nýtum okkur eitthvað af því sem ég er búinn að röfla,“ segir Bragi léttur. Einnig verða hafðir til hliðsjónar þættir sem voru gerðir í Svíþjóð og í Noregi. Sá norski hét Typisk norsk og þótti vel heppnaður. „Þetta verður hressilegri nálgun en oft áður en það hafa reyndar ekki verið málfarsþættir í sjónvarpinu síðan þeir voru að reka út úr sér tunguna og framkvæma öngljóð árið 1985,“ segir hann.

„Þetta er skemmtileg tilraun og ég er ánægður með að Rúv skuli ráðast í þetta verkefni.“ - fb