Stúdentakjallarinn gengið framar vonum

„Við erum með barþjóna hérna sem hafa unnið lengi á öðrum börum og þeir eru ekki alveg að skilja það hvaða kurteisa fólk er alltaf að kaupa bjór á Kjallaranum. Það eru alltaf allir svo glaðir og nice hérna," segir Björg Magnúsdóttir, dagskrárstjóri Stúdentakjallarans.

Stúdentakjallarinn hefur nú verið opinn í um tvo mánuði og hefur fengið frábærar móttökur. Þar eru viðburðir á dagskrá að meðaltali fimm sinnum í viku og alltaf þétt setið, en svo virðist sem allir dagskrárliðir sem settir eru upp á Kjallaranum slái í gegn innan háskólasamfélagsins og víðar.

„Janúar er örugglega versti mánuður ársins til að opna nýjan skemmtistað en við undirbjuggum, skipulögðum og plönuðum allt vel fyrirfram og það hefur algjörlega verið að skila sér," segir Björg.

„Við gerðum mjög nákvæmar áætlanir áður en við byrjuðum, um allt niðrí hvað þyrfti að steikja marga hamborgara á dag. Þær áætlanir hafa staðist næstum því upp á krónu en ég held að rauntölurnar í dag séu um 300 krónum frá áætluninni," bætir hún við.

Björg segir Kjallarann hafa náð að virkja 16.000 manna samfélagið í Háskóla Íslands vel með sér og það sé ótrúlega mikilvægt.

„Við erum algjörlega í skýjunum með móttökurnar en erum auðvitað stöðugt að bæta við okkur og reyna að gera enn betur," segir hún.