Rappþulan haldin í fyrsta sinn

Rappþulan er heitið á rappkeppni sem verður haldin í fyrsta sinn 19. apríl. Þátttakendur eru sextán ára og eldri frá öllu landinu. Keppnin sjálf fer fram í Molanum, ungmennahúsi Kópavogs.

„Það er svolítið síðan ég talaði við Molann um að mér fannst vanta rappkeppni fyrir sextán ára og eldri," segir skipuleggjandinn Sesar A, spurður um tilurð keppninnar en hann er sjálfur úr Kópavogi. „Mér finnst mikið vera að krauma undir en það vantar einhvern vettvang einmitt fyrir þetta."

Sesar veit hvað hann syngur, eða öllu heldur rappar, því hann er einn helsti frumkvöðull rapps á íslensku. Árið 2001 gaf hann út fyrstu sólóplötu sína, Stormurinn á eftir logninu, sem er fyrsta rappplatan eingöngu á íslensku.

Um nafn keppninnar, Rappþulan, segir hann: „Rappið er eins og þulan gamla, nema þróaðra að einhverju leyti."

Skráning í keppnina fer fram á Molinn.is/rappthulan. Umsóknarfrestur er til miðnættis 12. apríl.