Tom Cruise og Guy Ritchie í samstarf?

Tom Cruise er í viðræðum um að leika aðalhlutverkið í The Man From U.N.C.L.E. Myndin er byggð á samnefndri bandarískri sjónvarpsþáttaröð sem fjallar um tvo leyniþjónustumenn. Leikstjóri verður Guy Ritchie, maðurinn á bak við hinar vinsælu myndir Sherlock Holmes.

Kvikmyndaverið Warner Bros hefur haft augastað á myndinni í mörg ár. Upphaflega átti George Clooney að fara með aðalhlutverkið og Steven Soderbergh átti að leikstýra.

Samkvæmt Deadline.com hætti Clooney við vegna þess að hann varð að gangast undir skurðaðgerð, og skömmu síðar heltist Soderbergh úr lestinni. Í framhaldinu hafði Warner Bros samband við Ritchie, sem er einnig að undirbúa þriðju Sherlock Holmes-myndina.

Þrátt fyrir að vera orðinn fimmtugur er Cruise enn á meðal eftirsóttustu leikara í Hollywood. Hann leikur í nýrri Mission Impossible-mynd á næstunni, auk þess sem önnur mynd um Jack Reacher er í bígerð. Fyrsta myndin um Reacher halaði inn 215 milljónum dollara í miðasölunni á heimsvísu.

Cruise sést næst á hvíta tjaldinu í apríl í vísindaskáldsögutryllinum Oblivion, sem var að hluta til tekinn upp hér á landi.