Blondie til Bretlands

Bandaríska hljómsveitin Blondie, með söngkonuna Debbie Harry í fararbroddi, ætlar í tónleikaferð um Bretland og Írland í sumar.

„England hefur alltaf átt fastan sess í hjörtum okkar. Við erum öll virkilega spennt fyrir því að ferðast um Bretland," sagði Harry. Auk þess að halda staka tónleika spilar sveitin á tónlistarhátíðinni Isle of Wight 16. júní.

Síðasta plata Blondie, Panic of Girls, kom út 2011. Hún var sú fyrsta í átta ár, eða síðan The Curse of Blondie kom út.

Hljómsveitin gamalgróna hætti störfum 1982 en kom aftur saman 1997. Hún hefur selt um 40 milljónir hljómplatna og á meðal þekktustu laga hennar eru Call Me, Heart of Glass og The Tide Is High.